تخيل نفسك وانت راكب اتوبيس ورايح شغلك .. وفجاه لقيت الأتوبيس ماشى عمال يحدف يمين وشمال .. و مرة واحده لقته لف حته لفه فى شارع و خبط العربيات ايلى كانت واقفه جنبه .. وعمال يخبط يمين وشمال …
يا ترى حتحس بإيه وقتها ؟؟ هل حتكون مطمئن و ثابت ولا خايف وقلقان ؟؟؟
دا بالضبط ايلى حتحس بيه لو انت ماشى فى الدنيا بدون ماتكون عارف اهدافك بالتحديد .. تكون شايفها قدامك وعايشها بالتفصيل … وعشان كدا دائما حنشوف إن الفرق فى البدايه ما بين الشخص الناجح والشخص ايلى مش عايز ينجح هو.. تحديده لأهدافه .. لانه بيكون عارف بالضبط هو عايز إيه .. ورايح فين .. وإمكانياته إيه ..
لكن النجاح فى الدنيا مش بس إنك تكون عارف تحدد أهدافك .. لكن كمان لازم تكون واثق من نفسك إنك تقدر فعلا تحققها .. ومش بس تحققها لكن تعيشها وتحس بيها كأنك حققتها فعلا .. لان دا بيأثر على عقلك الباطن فبيخليك تعيش الحاله لحد ما توصل ليها فعلا … وفى نفس الوقت تكون مستعد انك تدفع الثمن .. والثمن دا هو راحتك … كسلك … إضاعه وقتك بدون فايده .. عدم تخطيطك لحياتك …وكذا وكذا وكاذ .. لو مستعد فعلا إنك تضحى بالحجاات دى .. فأحب أقولك أهلا بيك فى نادى النجاحين
طب مادام تحديد الأهداف مهم قوى كدا … إيه ايلى مخلينا مش بنسعى لتحديد اهدافنا ؟؟؟
فى حوالى 4 أسباب رئيسيه بتخلينا مش بنحدد أهدافنا وهى :
1. الجهـــــل :
عدم معرفتنا بأهميه تحديد أهدافنا بخلينا نعيش كل يوم زى التانى .. والغريب إننا مستنين إن بكرة يتغير وإحنا أساسا مش عارفين هو حيتغير لإيه ولا بنساهم فى تغييره ولو إتغير للأسوأ بنلوم الدنيا والظروف .. فى الوقت إيلى احنا ماحددناش لا للدنيا ولا للظروف إحنا عايزين إيه بالضبط .. فأول حاجه لازم تعرف إن تحديد اهدافك هو أول طريق نجاحك
2. عدم إحترام الآخرين :
لو جيت قولت لصحابك أو صاحبتك إن هدفى إنى اعمل مشروع مثلا او انى احصل على الدكتوراه حتلاقيهم بيضحكوا عليك و يسفهوا من اهدافك ومش بعيد يقعوا على الآرض من كتر الضحك .. فبالتالى بنحبط ونقعد جنبهم عشان نعيش زيهم ومايضحكوش علينا مرة تانيه .. يعنى بلمختصر بنسيبهم هم ايلى يتحكموا فى حايتنا وإحنا فاكرين إننا ايلى بنتحكم فيها ..ودى حلها بسييييييط جدا … الا وهو ( التجاهل ) تجاهل أى حد بيسفه أو يقلل من حلمك واهدافك لإنه ببساطه لو كان ناجح ماكنش عمره سفه او قلل من حلمك فالناجحين يأخذونك معهم إلى القمه اما الغير ناجحين يردونك جنبهم فى القاع وانت قرر حابب تكون مع اى فريق ؟
..
3. الخوف من الفشل :
أحب أقولك عزيزى الدوق عزيزتى الكونتيسه انه مافيش حد نجح من أول مره .. كل الناس الى نجحت فشلت كتير جدا .. بص حواليك شوف اى حد من معارفك او جيرانك او أصحابك ناجح . لو نجح من اول مره يبقى سوبر مان . لازم تفشل لإن الفشل بيعلمك النجاح وبيقولك إنت غلطت فى إيه بالضبط عشان ماتكرروش تانى .. ولكن اصبر شويه وكرر محاولاتك كتييييييييير جدا لإنه فى النهايه لازم تعرف إن تساقط قطرات الماء الصغيره تنحت الصخر .. فكر كده بهدوء وماتخفش فإنت قدها وقدود
4. منطقه الأمـــان :
طول مانت مرتاح عمرك ما حتتحرك لقدام .. طالمال بتجيب البطيخه و معاك عربيتك اللادا ايلى زى الفل .. ومرتبك بقضيك لحد يوم 15 فى الشهر حتحس إنك كده 100 100 وفى الآمان و100 فل و 14 .. بالعكس انت كده فى الخطر لإنك ساكن مكانك ومش بتتحرك .. قوم إتحرك اعمل حاجه .. جدد نفسك ونشط طاقتك لانك عمرك ما حتنجح وانت قاعد وكرشك طالع 5 متر لقدام .. قوم وورينا ابداعك ايلى ربنا حاطه فيك وحيحاسبك عليه .. فهل انت مستعد لحسابه ؟؟؟؟ إنت ايلى حتقرر برضه مش انا
ربنا سبحانه وتعالى لما خلقك حط فيك حاجه ماحطهاش فى غيرك … حتقولى إيه هى ؟؟ حقولك إشعرفنى .. دور انت عليها .. ولا أقولك إسمع أغنيه أحمد مكى ( دور جوة نفسك ) .. لانه زى ماخلق بصمات صوابعك عمرها ما تتكرر وسط مليارات البشريه .. انت كمان جواك حاجه مش متكررة مع مليارات البشر .. بس المهم دور عليها بجد ونميها حتلاقى نفسك بقيت شخص تانى خااااااااااااااالص غير إيلى انت تعرفه شخص بيعيش معنى الحياه .. وبيتنفس هواء الناجحين
بس الأهداف عشان تتحقق لها 3 شروط :
1. ركز على هدف واحد فقط مش اكتر من هدف عشان ماتشتتش نفسك وتضيع مجهودك على الفاضى وفى الآخر مش حتوصل لآى هدف من ايلى جريت وراهم وحتحس بالإحباط والتعب والندم على كل ما فات
2. ماتحطش اهداف متناقضه مع بعضها
3. خلى هدفك قابل للتحقيق .. من الاخر ماتشطحش باهدافك قوى فماتقولش انا عايز اكون رائد فضاء ومصر اساسا مافيهاش وكاله فضاء .. خلى أهدافك واقعيه عشان ماتحبطش و تكتئب و تضيع طاقتك على الفاضى
دلوقتى حقولك على 11 طريقه تقدر تحديد بيهم أهدافك … بس يا رب تطبقهم … مش تقرأهم وخلاص :
1. الرغبه … خلى عندك رغبه قويه جدا إنك تنجح فى حياتك مهما واجهت من صعوبات ومصاعب .. فالرغبه أساس النجاح
2. الثقـــه … خلى عندك ثقه بنفسك إنك حتقدر تحقق اهدافك .. لإن غيرك حقق أهدافه فإيه المانع إنك إنت كمان تحققها ؟؟
3. إكتب أهدافك … فاول خطوة لتحقيقها كتابتها فأهداف مش مكتوبه هى مجرد امانى ورغبات ليس إلا .. كتابتها نصف تحقيقها.
4. فائدتك من الهدف … وضح إيه الفائده إيلى حتعود عليك من تحقيق هدفك دا .. وإكتبها وحتفظ بها دائما وإقراها دائما
5. حدد موقعك … شوف إنت واقف فين الان من هدفك وشوف إيه إيلى بيمنعك فى الوصل له و تخطيه وإتحرك نحوة بكل قوتك
6. حدد التوقيت … حدد توقيت معين للوصل لهدفك عشان تقدر تقيم نفسك وتعدلها كل فتره وتشوف إنت حققت قد إيه منه
7. حدد العقبات … عشان ماتتفجأش بيها و حطلها خطط للمواجهه و خطط بديله عشان تقدر تتخطاها وتتغلب عليها فى كافه المراحل
8. إجمع معلومات … إجمع كافه المعلومات عن هدفك لتحديد أنسب الطرق للوصول إليه ولتكون ملم به من كافه الجوانب
9. الناس المساعده … ضع فى حسبانك من سيقف بجوارك لتحقيق اهدافك و ساعد الناس فذلك يسرع من تحقيق هدفك بمشيئه الله
10. خطه العمل … ضع خطه مفصله لتحقيق هدفك تشمل كافه العوامل السابقه محدده بالتفصيل لتكون جاهز لتحقيقه .
11. تخيل … تخيل إنك حققت هدفك فعلا وعيش بالإحساس دا صدقنى حتفرق معاك كتير قوى و حتقدر بمشيئه الله توصله فعلا
دا كل كلامى بالمختصر المفيد معلش طولت عليكم بس الموضوع مهم فحبيت أقولكم كل المعلومات ايلى ممكن تفيدكم
أتمنى يكون المقال مفيد و فيه معلومات قيمه .. بس المهم من القرأه التطبيق .. عايز تنجح طبق مش مجرد تقرأ
فى إنتظاركم فى المقال القادم ..
والسلام عليكم ورحمه الله وبركاته
خالد الحداد
مدير مركز ستارت للتنميه البشريه واللغات
الأتوبيس الطـــــائش ... ( تحديد الأهداف )
ليست هناك تعليقات:
إرسال تعليق